Әкімге сұрақ қою

Сұрақ - Күні: 2010-07-03 13:45:24 - Авторы: Қалдыбек Дюсебеков - Шолақ-қорған ауылы
Созақ ауданындағы Бессаз тальк кенорыны туралы барлық мәліметті 2006 жылдан бері жинап 2008 жылы "ҚАСЕЙ" ЖШС ашып осы бағыта жұмыс істеуді қолға алсақ деген мақсатамыз,егерде өкіметтен көмек болса 400 жұмыс орны болар еді.

Жауап:
Бессаз тальк кең орнын іске қосу жобасының тиімділігіне сараптама жүргізілуде. Аталған жоба тиімділігі айқындалған жағдайда "Созақ ауданы аймағын 2011-2015 жылдарға арналған дамыту бағдарлама жобасына" енгізу жұмыстары жүргізілетін болады.

Сұрақ - Күні: 2010-07-03 00:59:31 - Авторы: Айнагуль - ОҚО Шымкент
Сәлеметсізбе, құрметті Асқар Мырзахметұлы.Мен ОҚО Халыққа қызмет көрсету орталығы туралы сұрақ қояйын деген едім. 2010 жылдың қаңтар айының 05-ші жұлдызынан бастан ХҚКО Облыстық Әкімдік аппаратқа өткендігін естідім. Дегенмен, осы болып жатқан жағдайлардың қандай пайдасы бар екендігін қарастырып берсеңіз және де болашақта бұл 100-300 адамнан тұратын үлкен жұмыс орнының (яғни,орталыұ)алдағы уақытта болашағы барма? Естуімізше жабылады деседі. Бірақ, қазіргі тоқырау,дағдарыс заманда жабылса қызметкерлер қайда барады деген сұрақ туындайды емес пе??? осы мәселелер бойынша қысқаша айтып өтсеңіз. Алдын ала зейін қойғаныңыз үшінРАХМЕТ!!!

Жауап:
ҚР Үкіметінің 2010 жылғы 15 қаңтардағы №11 қаулысына сәйкес, ҚР Әділет министрлігі Тіркеу қызметі және құқықтық көмек көрсету комитетінің Халыққа қызмет көрсету орталықтары 2010 жылдың 1 қаңтарынан жергілікті атқарушы органдардың қарамағына берілді. Оңтүстік Қазақстан облысы әкімінің аппараты - уәкілетті орган болып табылады. ХҚКО мемлекеттік мекеме қызметінің мақсаты халыққа "бір терезе" қағидаты бойынша өтініштерді қабылдау және құжаттарды беру жөнінде мемлекеттік қызмет көрсетуді ұсыну болып табылады. Қазіргі танда ХҚКО-ын жабу емес керісінше арттыру мақсатында жұмыс жүргізуде. Қолданыстағы заңнамаларға сәйкес ХҚКО 59 мемлекеттік қызмет түрлерін жүзеге асыруға құқылы. Оңтүстік Қазақстан облысы әкімінің аппараты мемлекеттік қызмет көрсету сапасын бақылау бөлімі қазіргі уақытта ХҚКО мемлекеттік мекемесі халыққа сапалы қызмет көрсету мақсатында бір шама істер атқаруда. Облыс әкімінің тапсырмасына сәйкес, қажеттілігіне байланысты облысымыздың шалғайда жатқан елді мекендерін және халық тығыз шоғырланғандығын ескере ХҚКО өкілдіктері, қабылдау терезелері ашылып, жүйелі түрде жұмыс жүргізуде.

Сұрақ - Күні: 2010-06-29 16:09:21 - Авторы: Жумашева Б.Б. - Шымкент қаласы,Север,59/41
Құрметті Асқар Исабекұлы!Менің анам 7 ұл-қызды дүниеге әкелген, барлық балалары тірі, бірақ бір қызы 2006 жылы 4 қыркүйек күні 37 жасында көлік апатынан қаза болған. Менің анама алтын немесе күміс алқа иегері болуға бола ма?

Жауап:
Сіздің анаңызға көп балалы ана ретінде, яғни 6 бала тапқаны үшін «Күміс алқа» иегері атағы беріледі. Ол үшін Сіздің анаңыз тиісті құжаттарды тұрғылықты жері бойынша аудан, қала әкімдігінің, награда бөліміне тиісті құжаттарды тапсыруы тиіс.

Сұрақ - Күні: 2010-06-26 13:46:53 - Авторы: Жанболат - Шымкент қаласы
Саламатсыз ба? Сізге хат жолдауымның себебі. Ата-анамның үйінің жер учаскісінің ішінен үй салып жатырмын. Ол үйді жеке өз бетінше қалай заңдастыруға болады. Жер комитетіне барсаң азаматтарды сандалтып жібереді. Маған нақты қандай құжаттар мен қайда бару керектігі туралы айтсаңыз. Жер комитетінің қызметкерлері жөнді ештеңені түсіндірмейді.

Жауап:
ҚР Жер кодексінің 51 бабына сәйкес жер учаскесі бөлінетін және бөлінбейтін болуы мүмкін. Өзінің нысаналы мақсатын өзгертпей және өртке қарсы, санитарлық, экологиялық, құрылыстық және өзге де міндетті нормалар мен ережелерді бұзбай бөліктерге бөлуге болатын, бөлінгеннен кейін әрқайсысы дербес жер учаскесін құрайтын жер учаскесі бөлінетін жер учаскесі болады, бұлай болмаған жағдайда ол бөлінбейтін болып табылады. Жер учаскесінің бөлінбейтіндігі сәйкестендіру құжатында көрсетіледі. Жер учаскесінің бөлінетін бөлігімен мәмілелер жасаған кезде, бұл бөлік белгіленген тәртіппен алдын ала дербес жер учаскесі болып бөлініп шығарылуға тиіс. Қалған жағдайларда мәміле нысанасы оны шартта сипаттау немесе жер учаскесінің бөлігіне белгіленетін құқықтың қолданылу аясын (жалдау, өтеусіз пайдалану, сервитут және басқалары) сәйкестендіру құжатына енгізу арқылы айқындалуы мүмкін делінген. Егер сауалыңызға көрсетілген ата-анаңыздың жер учаскесі бөлінетін болып табылса, бөлінген жер учаскесін сату немесе сыйға тарту арқылы алып, оған тиісті сәйкестендіру құжаттарын рәсімдеп пайдалануыңызға болатыны хабарлаймыз.

Сұрақ - Күні: 2010-06-26 01:42:32 - Авторы: Мадина Абишова - Шымкент.Абдразаков көшесі
Салеметсізбе?Мен жас ана,жас жанұялы мын!Мен жалдамалы патерде тұрамын.Менің сұрайын дегенім жас отбасыларға ипотекаға немесе көмектер барма?Қалай уй мәселесін шешуге болады?Жағдайымыз төмен болуына байланысты уй алалмай отырмыз!Сизден өтінішім қандй көмек бар?Алдынала рахмет

Жауап:
Қазақстан Республикасының Үкіметінің 2008 жылғы 19 шілдедегі «Қазақстан Республикасында 2008-2010 жылдарға арналған тұрғын үй құрылысы Мемлекеттік Бағдарламасы аясында салынған тұрғын үйлерлі жергілікті атқарушы органмен тарату Ережесін бекіту туралы» №711 Қаулысының 11 тармағына сәйкес, келесі санаттағы азаматтардың пәтер алуына болады: Басымдық құқыққа ие санатқа келесі азаматтар жатқызылады: - жас отбасылар; - мемлекеттік қызметшілер; - мемлекеттік мекемелердің мемлекеттік қызметші болып табылмайтын қызметкерлері; - мемлекеттік кәсіпорындардың қызметкерлері Несиелердің беру шартары келесідей: - алғашқы жарнасыз, - 4 пайыздық банктің жылдық сыйақысымен, - 23 жыл несиелендіру мерзімге беріледі. Толық мәлімет алу үшін Сіз шымкент қаласының тұрғын үй-коммуналдық шаруашылық, жолаушылар көлігі және автомобиль жолдары бөлімінің тұрғын үй секторына хабарласуыңызға болады. Мекен-жайы: Республика даңғылы 6а үй 2 бөлме.

Сұрақ - Күні: 2010-06-24 10:39:39 - Авторы: Назира Мауленова - iзет-29
Амансызба құрметті Асқар Исабекұлы . Мен Шымкент қаласы Шұғыла мөлтек ауданы Ізет көшесі тұрғынымын. Міне 7-жылдан бері көшемізде су,газ телефон,жол жок. Биыл сіздін арқанызда су қосып берді оған үлкен алғыс білдіргім келеді!!! Енді газ жол мәселесін шешіп брсеніз, көктем келісімен жаңбыр жауса болды балшық болып жүре алмай қаламыз мектепке баратын жол жоқ мектеп ұзақ осы көше оқушыларына мектепке барып келу қыйындық тудырып отыр

Жауап:
Шымкент қаласы Шұғыла шағын ауданының Ізет көшесіне жөндеу жұмыстарын жүргізуге 2010 жылға қаржы қарастырылмаған. 2011 жылдың бюджетін нақтылау кезінде ұсыныс енгізіледі.

Сұрақ - Күні: 2010-06-23 18:07:30 - Авторы: Сырлыбаева Хатира - Кентау
Мен Сырлыбаева Хатира 1941 жылғы Кентау қаласы Советская көшесі № 38 үй тұрғынымын. 2010 жылы қаңтар айында 7 баламның құжаттарын Алтын алқа алу үшін Кентау қаласының әкімдігіне тапсырғанмын. Алайда бүгінгі күнге дейін жауап жоқ, ал көршім Бейсенбаева Д. мен құжаттарды тапсырып болған соң, менен келіп қандай құжаттарды тапсыру керектігін сұрап жүрген- Күміс Алқасын алып қойды. Бұл жағдайды қалай түсінеміз? Немесе тез алудың басқа жолы барма? Мен бірінші топтағы мүгедікпін. Қан қысым көтеріліп қайта -қайта емхананың жан сақтау бөлімінен бірақ шығамын. Менен кейін өткізгендер ендігі берілетін жәрдем ақысын алып жатыр. Менікі неге кешігіп жатыр? Мен құжаттарды уақытылы өткізген кезден Алтын алқа белгісен алғанға дейін айырмашылығын кім төлейді? Әлде Елбасынан көмек сұрау керекпе. Рахмет. телефоным 8-72536-48686

Жауап:
Сіздің құжаттарыңыз облыс әкімінің 2010 жылғы 9 маусымдағы № 02/356 ұсыныс хатымен ҚР Президенті Кеңсесінің награда секторына жолданған. «Қазақстан Республикасындағы арнаулы мемлекеттік жәрдемақы туралы» Қазақстан Республикасының 1999 жылғы 5 сәуірдегі № 365-І Заңы 5-бабының 1-тармақшасына сәйкес, жәрдемақы тағайындау үшін өтініш жасау, қандай да болмасын мерзіммен шектелместен, жәрдемақы алуға құқық пайда болғаннан кейін кез келген уақытта жүзеге асырыла алады. Яғни, көп балалы ана жәрдемақы алу құқығына қолына орден кітапшасын алғаннан кейін ғана ие болады. Сонымен қатар, көп балалы ананың құжаттары жергілікті атқарушы органда, облыс әкімдігінде және ҚР Президенті Кеңсесінің награда секторында сараптау сатысынан өткеннен кейін ғана Қазақстан Республикасы Президентінің Жарлығы шығатын болғандықтан, барлық анаға орден кітапшасын бір мезгілде беру мүмкін емес екенін хабарлаймыз.